Keleier 11 a viz mae | Intermarché Rostrenn, Brittany Ferries, Omofobiezh : "Aon m'eus bezañ taget", Hollande e Haïti

Annezidi Rostrenn skoazh ouzh skoazh gant gopridi *Intermarché *

Serret e vo benn 2017 basenn intermaché Rostrenn gant renerien Intermarché . Kaset e vo ar stal-mañ betek Neuillac gant an hanter neubeutoc'h a bostoù. D'ar meurzh 12 a viz mae e vo kinniget ar raktres-mañ d'un doare ez-ofisiel da gopridi stal ar C'hreiz-Breizh. Setu perak o doa manifestet 300 annezad Rostrenn, hag an dro war droioù, dilun vintin. En o zouez e oa Herve ar Gal ezel eus an UDB :

ⓘ Publicité

"Kalz a familhoù a labour amañ ha n'emaomp ket evit degemer seurt keloù" Herve ar Gal, ezel eus an UDB

Brittany Ferries : "Dañjerus e oa untrudu ar renerien" eme sindikad ar vartoloded

E fin an abardevezh o doa CGT an dokerien ehanet gant o harz-labour. Goulenn a ra paotred ar porzhioù ur gresk 4 % eus o goproù. Evit poent n'int ket trec'h met un emgav a vo, d'ar Merc'her 13 a viz mae, etre ar sindikadoù ha renerien ar porzh. Neuze, gall a raio bigi ar Brittany Ferries mont en-dro er porzhioù ma z'int kustum bezañ. Met chom a ra fuloret sindikadoù an dud-a-vor goude gwall-daol mestr ar Britany Ferries, e porzh-mor Ouistreham, en dibenn sizhun-mañ. Gant un ugent bennak a lodennerien all e oa aet Jean Marc Roue da gerc'had dre heg ur vatimant dalc'het ouzh ar c'hae gant harzh labour an dokerien. Kenskoazell gant dokerien Ouistreham, ne falveze ket ken da dokerien porzhioù all degemer listri ar Brittany Ferries. Displegadennoù Jañ Luk Bergot :

Haïti : un enezenn o poaniañ c'hoazh

D'an 12 a viz mae e vo François Hollande, prezidant ar republik, war enezenn Haïti. Klozañ a raio e veajoù er C'haraib en ur weladenniñ an enezenn-mañ. Un enezenn hag a zo c'hoazh gwall distrujet. Pemp bloaz-zo e oa bet ur c'hren douar kreñv tre ha lazhet e oa bet 300 000 den , miliadoù ha miliadoù all a oa bet gloazet ha kollet e oa bet o zi gant 1 200 000 den. Abaoe pemp bloaz emañ ar gevredigezh Douar Nevez o sikour annezidi Haïti da vevañ un tammig gwelloc'h. Da skouer e vez kaset ganto dafar evit netaat an dour . René Ferec ezel eus ar gevredigezh Douar Nevez :

"Gouzout a reont deus petra o deus ezhomm hag ezhomm o deus arc'hant dreist-holl"Rene Ferec, ezel Douar Nevez

Enebiñ an omofobiez dre ar gaoz

Sed aze pal ar festival Fais pas Genre hag a vo dalc'het adalek  ar Meurzh 12 a viz mae e Brest. Bez 'vo divizoù, konferañsoù, filmoù hag abadennoù sirk. Pal ar gevredigezh Divers Genre a zo lakaat ar gomz war an identelezhioù d'un doare dudius. Ret eo lakaat da glevet mouezh ar gumuniezh LGBTH eme Fañch, prezidant ar gevredigezh Divers genre, rak eo bet diskleriet traoù "eugus " ar bloaz paseet e mare divizoù an "Eured evit an holl" . Santet e vez c'hoazh un omofobiezh hervez Fañch prezidant ar gevredigezh Divers Genre :

"Kuzhaat a ran c'hoazh va identelezh da dud-zo"Fañch, pzdt ar gevredigezh Divers Genre